Ukubona ngale kwezimfihlo

Ngiyanibingelela nonke bafuthi abaqotho futhi ngamukela nabo bonke abasanda kusijoyina ekubeni abangane bakaSondela ngokuxhumana nathi.

Labo phakathi kwenu abaziyo ukuthi iSandulelangculazi neNgculazi kusithikameza kanjani empilweni, bazithola kumele bakhulumele safuthi, bakhulume kakhulu ukuqinisa imizamo yokuvikela, ukunakekela nokwelashwa.

Labo abamele kude bengazithinti begcina nje ngokuzwa, bazozithola maduzane nje sekufanele bayeke ukuzwa bagcine ngokungenzi lutho ngokwenziwa yilolubhubhane kodwa sekumele bavulisise izindlebe nezingalo zabo.

Imibiko esemthethweni ekhishwe ezikhishwe kulezinyangana ezimbalwa ezidlule, ikhomba ukuthi abasebenzi basezibhedlela nasemitholampilo bathwele kanzima ngenxa yokwehla kwesibala sabahlengikazi, odokotela nosokhemisi abamelene nokubheka izidingo zeziguli kanti nezabo izimpilo zithanda ukuntengantenga. Ezikoleni silahlekelwa ngothisha abaqeqeshekile bebulawa yiNgculazi. Izinga lokukhulelwa kwentsha liphezulu ngendlela engazane ibonwe ngaphambili. Ukukhiqizwa kokudla ezweni lethu kukhutshazwa ukugula nokufa okudalwa yiNgculazi lokhu kwandisa kakhulu ubuphofu ezindaweni zasemaphandleni nakulezo ezisemadolobheni, udlame olubhekiswe kwabesifazane nezingane nalo luyadlondlobala.

Abanye babantu bakithi eMzansi Afrika, baphila futhi bafa buthule ngoba besaba ukulahlekelwa yimisebenzi yabo, abahlekisana nabo,imindeni yabo, abakhonza nabo kanye nabangane babo. Singenza kanjani sivuke sizithathe sibhekane nalokhu okufuna ukusicekela phansi kusishabalalise, sibuyise ithemba khona sizokuba nekusasa na? Njengabaphila ngokuhlalisana singabhekana kanjani nokuthi isenzo sokukukhombisa nokwandisa impilo sesphenduke saba yisisusa somzwangedwa nencithakalo?

Ithemba lethu likulabo bantu abazikhathaza ngabanye, abangagxeki futhi abangahlazisi muntu ngoba bekholelwa ekuthini- silapha njengabantu ukuze singabukani nje kodwa sibukisane, sisizane. Wonke umuntu , kungaba yindoda, yinkosikazi, noma ingane, eneSandulelangculazi noma engenaso unokuthize angakufundisa umhlaba(abanye).

Abantu abanjengalaba baveziwe kuleliphephabhuku- hayi nje kuphela laba abangabaholi njengoAnnastasia Kweyama waseNtshongweni noPhumzile Ndlovu waseBergville kodwa nalabo abathintana nabo abangashiwongo ngamagama, futhi abavuselela bekhuthaza labo abazizwa bekhishelwe ngaphandle. Bazikhathaza ngabanye ngoba nabo sebake bakuthola ukukhathalelwa kanti futhi ngolunye usuku bangase bamdinge oyobakhathalela abanakekele. Indaba ngabantu abahlanganyele ezivandeni zemifino zaseSinikithemba, ingumzekeliso omuhle walokhu, bazihlanganisa nabanye bachithe isikhathi sabo belima, betshala ukuze kutholalakele ukudla okuyinto edingeka kakhulu ukunika impilo namandla.

Yiwo lomuzwa wokuba nobuhlobo obujulile nokuba munye nabantu kanye nezwe okwenza kubelula ukubhekana nokwesaba, ubuhlungu, ukwesaba, uqhekeko, ukubandlululwa nodlame olusebantwini emiphakathini yakithi. Omdala nomncane, ocebile nompofu, indoda nenkosikazi, abantu bazo zonke izinkolo, amasikompilo nobuhlanga bayazi ngalobu bunzima. ISandulelangculazi neNgculazi yisimo sobuntu esibucayi esikubeka obala konke okusihlanganisa njengabantu. Kubona bonke lobu buhlungu ezibudalayo kukhona isiqalo sokulapheka nethemba elisha ngekusasa. Ukukhuluma, ukuhlangabezana, ukuphakamisana, ukuqinisana nokusondelana. Woza esiyingini sethu- usixoxele indaba yakho.

Sondela: Thintana nathi:
Judith King – uMhleli
HIVAN (Centre for HIV/AIDS Networking)
c/o Public Affairs Annex, University of KwaZulu-Natal, Durban 4041
Ucingo: (031) 260 2975
Ifeksi: (031) 260 2013
e-mail: judithk@hivan.org.za
Website: www.hivan.org.za

<<Back